Human ang ilang training sa Division Training School sa 1st Infantry Division sa Labangan, Zamboanga del Sur, nagtapos kagahapon ang tulo ka mga biyuda sa mga sundalo nga namatay atol sa Marawi siege niadtong 2017, isip mga private.
Dungan sa ilang pagtapos, ilang gidawat ang ilang mga service firearms o armas nga gihatag kanila atol sa usa ka Ceremonial Entrustment of Firearms ceremony sulod sa headquarters sa 1st Infantry Division.
Ang mga bag-ong babayeng Army private mao sila si Grace Allaga, asawa sa namatay nga si Corporal Ardnie Allaga kinsa na-assign kaniadto sa 10th IB; Private Merzie Rogador, asawa ni Private First Class Eldon Rogador; ug Private Christine Mary Montero, asawa ni Corporal Marjone Montero, nga parehong na-assign sa 51st IB.
Ang bana ni Rogador ig-agaw ni Private First Class Dhan Ryan Bayot, ang sundalong namatay sa Marawi dihang nangayo kini sa iyang commander nga bombahan na ang iyang nahimutangan tungod kay napalibutan na siya sa kontra.
Sila si Bayot ug Rogador kauban sa usa ka team ug pareho nga namatay niadtong higayona.
Ang bana usab ni Montero namatay sa adlaw nga gisaulog ang Father’s Day, Hunyo 2017, samtang ang bana ni Allaga namatay Agosto 2017 samtang kamulong gibawi sa militar ang usa ka lugar sa Marawi nga gihimong salag sa mga terorista. Boluntaryong miapil sa Army ang tulo pinaagi sa special enlistment nga gipirmahan ni Presidente Rodrigo Duterte.
