” Kuya maraming salamat , hindi ko na kaya ang init.”
Ulihi na sang nakahibalo ang mga call center agnets nga yara sa 4th floor sang NCCC Mall nga nagakasunog na ang building nga ila ginahamtangan.
Sa pagpakig-angot sang RMN Iloilo sa RMN Davao, nahibaluan nga wala naga-gana ang fire alarm kag sprinklers sang 15 ka tuig nga mall kag sirado man ang fire exit sini.
Santo sa impormasyon nga nagpadulong sa banyo ang mga call center agents kag ila ginbasa sang tubig ang ila kalawasan apang bangud zero visibility na sa lugar wala ang mga ini sang may nahimo.
Nakatawag pa ang mga biktima sa ila pamilya kag nagapangayo sang bulig kag may isa pa ka lalaki nga call center agent nga nagtext sa iya utod nga , ” Kuya maraming salamat . . . hindi ko na kaya ang init.” kag makaligad ang 30 minutos, indi na ma-contact ang cellphone sang mga ini.
Nagbuligay ang mga rescuers apang wala sila sang may nahimo agud sudlon kon sa diin na trap ang 37 ka mga call center agent bangud tuman kadako ang kalayo.
May mga survivors man sa 4th floor sang building apang wala ang mga ini nakabulig bangud ila gin-una ang ila kaugalingon agud makaluwas.
Naglab-ot sa duha ka adlaw antes nagdeklara ang Bureau of Fire protection nga fire-out .
Sa karon, padayon ang retrieval operation sa lugar kon sa diin nakita na ang bangkay sang isa sa 37 ka mga biktima nga na-trap apang luto ang bug-os nga lawas sini.
Suno pa sa BFP nga nabudlayan sila nga makita ang bangkay sang iban pa bangud nahulog ang mga ini sa 2nd floor gikan sa 4th floor sang building kag natabunan sang mga debris.
Apisar emosyonal kag dismayado ang pamilya sang mga biktima bangud suno sa mga ini, tuman kadugay kag wala sang kongkreto nga plano ang mga rescuers, nagalaum gihapon sila nga buhi ang ila mga himata.
Nahibaluan nga antes natabo ang sunog sa NCCC Mall sang Sabado sang aga, Disyembre 23, ginbaha man ang pila ka mga barangay sa Davao sang Biyernes sang gab-i , Disyembre 22.
(photo from web)
