Kini dili lamang makausa apan makapila nang higayon dunay mga construction workers ang napalitan og droga ug nadakpan sa mga otoridad sa matag buy-bust operation.
Gani laing usa ka construction worker ang nasakuti na usab sa mga sakop sa Sasa PNP-Drug Enforcement Unit di pa lamang dugay.
Ang suspek giilang si Rey Dancel Repollo, hingkod ang pangidaron, minyo, ug nagpuyo sa Panacan kinsa pila ka adlaw nga gipanid-an sa intel operatives hangtud nahog sa mga kamot sa mga tinugyanan sa balaod.
Nasayran nga gikasa ang operasyon human mikubit sa paon sa kapulisan diin gipahigayon ang transaksiyon sa may Panacan bandang 9:00 sa gabii.
Gipusasan ang suspek human gitunol ang usa ka sachet sa gitohoang shabu ngadto sa pulis nga nagtakuban dungan sa pagdawat sa P500 nga mark money.
Nakuhaan pa og laing pakete ang suspek nga mukantidad tanan og 2,000 pesos, P500 nga mark money, selpon nga gigamit sa ilegal nga transaksiyon sa suspek.
Kasong kalapasan sa Republic Act 9165 kon Comprehensive Dangerous Drugs Act of 2002 ang atubangon nga asunto sa suspek kinsa tingkagol na karon sa selda sa Presinto #4.
RadyoMaN Joel Viray
