Pagadian City – Nahimong hapsay ug malinawon ang prusisyon isip pagsugod sa selebrasyon sa kapistahan ni Señor Santo Niño sa dakbayan sa Pagadian.
Wala gipanumbaling sa mga deboto ang Santo Niño ang kainit sa panahon diin nisaksi sa opening salvo sa pantalan ug prusisyon kagahapon sa hapon hangtud sa unang novena mass sa Sto. Niño Cathedral.
Sumal ni Police Lt. Col. Alvin Saguban, kauban sa kapulisan sa syudad ang kasundalohan sa 53rd Infantry Battalion, Provincial Mobile Force Company, ug ubang non government organization aron magpabilin ang kahusay sa selebrasyon.
Gimontar usab ang CCTV Camera sa pantalan diin maoy dagsaon sa tawo karong concelebrated mass nga ipahigayon petsa 18 sa kadlawon.
Naka-standby usab ang police assistance desk sa gawas nga bahin sa cathedral kun asa gipahigayon ang mga novena mass.
Sumala usab ni Pagadian City Mayor Sammy Co, walay mahitabong cellphone signal shutdown atol sa Sinulog ug street dance Competition karung petsa 19 sa hapon nga salmotan sa 26 ka mga contingents nga mailog sa unang pwesto nga dunay gigahin nga premyong mobalor sa tunga sa milyon.
Lauman usab ang pagbisita atol sa kapistahan sa duha ka Kapamilya celebrities nga sila si Aljur Abrenica ug Bela Padilla.
