Nagpadayon karon ang imbestigasyon sa Bureau of Fire Protection kon BFP-Valencia, Valencia City Police Station kaabag ang 88th Infantry Battalion, Philippine Army sa nahitabong pagpanunog sa mga sakyanan ug ekipo sa usa ka quarry site sa Purok 6, Sinabuagan, Valencia City niadtong Biyernes (June 19, 2020) sa gabie.
Nasayran nga apil sa mga gisunog sa gitouhang grupo sa New People’s Army kon NPA ang 2 ka mga payloader, 2 ka dumptruck, duha ka spare tire ug usa ka backhoe.
Sa interview sa RMN ngadto kang Col. Ferdinand Barandon, ang commander sa 403rd Infantry Brigade gibutyag niini nga ang grupong NPA sa Guirrella Front Malayag ang anaa sa likod matud pa sa mao nga pagpanunog sa mga ekipo.
Nasuta usab nila nga sa wala pa ang mao nga insidente, nakadawat na extortion letter gikan sa mga NPA ang tag-iya sa mao nga quarry.
Gipahayag usab ni Col. Barandon nga aduna na silay regular nga pakiglambigit sa mga negosyante nga posibleng target sa mga NPA aron dili mabiktima sa extortion.
Apil sa mga kaso nga ipasaka batok sa mga NPA ang kasong arson ug kasupakan sa IHL.
Sigun ni Col. Barandon nga signatory ang NPA pinaagi sa National Democratic Front kon NDF sa IHL kung asa dili niini angayang atakehon ang mga civilian facility kay dili kini mga combatant.
