Mga empleyado sa pribado nga kumpanya sa rehiyon dose may lauman nga P25.00 daily pay hike.

Makabaton sang dugang nga P25.00 daily pay hike ang mga minimum wage earners ukon mga empleyado sa pribado nga kumpanya sa rehiyon dose nga ipatuman sang duha ka tranches.
Ini matapos aprobahan sang mga katapo sang Regional Tripartite Wages and Productivity Board (RTWPB 12) ang Wage Order no. 21 sang Disyembre 16 sang nagligad nga tuig matapos nakit-an nga may basehan nga pasakaan ang sweldo sang mga empleyado tungod sa pagtaas naman sang cost of living kapareho sang pagtaas sa presyo sang basic commodities kag iban pa sa rehiyon matapos nga 19 na ka bulan ang nagligad sang ginpatuman ang wage order no. 20 sang Mayo tuig 2018.
Base sa wage order tanan nga mga empleyado sa rehiyon ang makabaton sang daily minimum wage rate nga P15.00 sa first trance nga ipatuman sa tion nga mag-epektibo na ang increase matapos ang 15 diyas nga publication sa lokal nga newspaper kag ang P10.00 ang mabaton naman epektibo sa Mayo 1, 2020.
May-angot sini, ang sa non-agriculture sector makabaton na sang P326.00 daily wage halin sa pag-epektibo sang wage order kag sa Mayo 1, 2020 makabaton na sila sang P336.00, samtang sa agriculture/retail/service sector makabaton sang P305.00 sa una nga trance kag sa Mayo 1 subong nga tuig makabaton na sila sang P315.00.
Sa subong ang minimum wage rate sang mga empleyado sa non-agriculture – P311.00 kag sa agriculture/retail/service establishement P290.00
Suno kay RTWPB 12 Secretary Jessie dela Cruz tanan nga mga empleyado bisan ano pa ang posisyon kag status ang makabaton sang increase kag ang sarang lamang nga maapply ang exemptions sa mga retail/service establishments nga manubo sa napulo ang empleyado kag ang mga establishemento nga apektado sang kalamidad.
Indi naman cover sang panibag-o nga wage order ang Cotabato City tungod sakop na sila sang Bangsamoro Autonomous Region in Muslim Mindanao.
Samtang ang wage order ang ginsubmitir pa sa National Wages and Productivity Board Commission para sa review kag affirmation bag-o ang publication sini.