Human sa ilang pag-protesta niadtong Dominggo tungod sa ilang kahimtang sulod sa usa ka building, gitakda nang ibalhin karong adlawa ang kapin 50 ka mga empleyado ug sakop sa pamilya sa Tongas tailoring nga naa mahimutang sa Barangay Poblacion, ning dakbayan.
Reklamo sa maong mga empleyado ug tag-iya sa establisimento nga naghu-ot sila sa maong building nga nagsagol ang nag-positibo sa COVID-19 swab test, mga naghulat sa resulta ug wala pa na-swab test.
Gireklamo usab nila ang walay tabang nga gitunol ang LGU Iligan kabahin sa ilang pagkaon, tambal ug vitamins ug ilang mga higala lamang ang nag-suplay kanila sa mga panginahanglanon sa ilang mga empleyado sa sulod.
Una na’ng giangkon ni Jose Pantoja, ang tigpamaba sa kagamhanang lokal sa Iligan, nga wala dayun mabalhin ang maong mga empleyado tungod sa kakulangon sa isolation facility.
Wala usab nakapanghatag ang LGU og pagkaon ug vitamins tungod kay bag-o ang nabutang nga manager sa Emergency Operations Center sa inter-agency task force.
Apan ang ubang mga alegasyon, dili, matud pa tinood.
Ang bag-ong isolation facility sa Barangay Poblacion, nga adunay 40 ka bed capacity, gitrabaho sa Department of Public Works and Highways (DPWH). (Divina M. Suson, August 26)
