Davao City – Gikatakdang magpahigayon og inspeksyon ang City Engineer’s Office (CEO) sa mga eskwelahan dinhi sa syudad sa Davao human sa 7.1 magnitude nga linog niadtong Huwebes (Enero 21, 2020) nga misentro sa Jose Abad Santos, Davao Occidental.
Sa interbyu sa DXDC RMN Davao kang Atty. Joseph Dominic Felizarta, Head sa CEO, gibutyag niini nga bisan og walay gihimong face-to-face classes tungod sa Coronavirus Disease 2019 (COVID-19) pandemic, ilaha gihapong inspeksyonon ang mga gi-report sa City ug Barangay Disaster Risk Reduction and Management Office (DRRMO) nga mga eskwelahan nga posibleng naapektuhan sa pagtay-og.
“Naay mga report sa amoa sa Barangay DRRMO ug CDRRMO nga ipa-inspect ‘ning mga eskwelahana ni, nag-utilize gihapon mi. Iapil lang namo siya sa among schedule kay wala may klase,” matud ni Felizarta.
Una nang gi-inspeksyon sa CEO ang mga government buildings/offices sa syudad nga gideklarang ‘safe for occupancy’ o luwas nga gamiton diin minor cracks lamang ang naangkon sa maong mga gambalay.
Samtang, nakig-koordinar na usab ang buhatan sa Department of Public Works and Highways (DPWH) sa pag inspeksyon sa mga imprastraktura ilawom departamento sama sa mga tulay nga posibleng naapektuhan sa kusog nga linog.
RadyoMaN Kirby Manzon
