General Santos City–Nagpasidaan si Calumpang Barangay Kapitan Ryan Dupalco nga mamahimong ipaaresto ang mga wala nagasunod sa mga protocol sa gobyerno kalabutan sa pakigbatok sa Covid-19 sama nalang sa pagsul-ob ug facemask, Social distancing ug uban pa.
Ang pahayag gibutyag sa Kapitan kini human nagpadayag ug kaalarma ang katawhan sa iyang Barangay human nasayran nga adunay usa ka personahe nga nagpositibo sa Covid-19 nga nakasuroy pa sa usa sa mga bar sa Iyahang Barangay.
Mapasalamaton hinuon si Kapitan Dupalco human nga nagnegatibo sa virus ang resulta sa Rapid Test sa siyam ka mga personahe nga gikaingong may close contact ngadto sa nagpositibo sa Covid nga una nang nagsuroy sa ilang lugar.
Ang mga nasangpit matud pa ang kasamtangang anaa karon sa Isolation Facility sa Barangay.
Pahimangno sa Kapitan sa mga residente sa lugar ug sa mga negosyante nga tumanon ang tanang protocol sa gobyerno aron nga makalikay sa makamatay nga virus.
Gikumperma usab ni Kapitan Dupalco nga pabiling sarado ang bar nga gisudlan sa LSI nga una nang nagpositibo sa Covid-19.
21 ka adlaw matud pa nga isirado ang maong establishemento aron masiguro nga luwas kini sa Covid-19. Kini subay na usab sa protocol nga ginapatuman sa LGU Gensan.
