Nabahin ang mga internally displaced persons sa Marawi City kagahapon sa paghandum sa ikaduha ka tuig nga nahitabong giyera nga mikutlo og daghang kinabuhi ug miguba sa daghang mga balay ug mga kabtangan.
Naa sa usa ka barangay sa siyudad ang kapin gatus ka mga kabataan ug mga sakop sa civil society organizations, dala ang mga plakard, aron isinggit ang pagtugot sa gobyerno nga makabalik na sila sa ilang mga kanhi lugar sulod sa most affected area.
Ang uban kanila gikan pa sa Maqbara public cemetery sa Barangay Papandayan Caniogan aron motambong sa unveiling sa na marker sa lubnganan sa halos 300 ka wala mailang mga namatay atol sa lima ka bulang giyera niadtong tuig 2017.
Samtang nahitabo kini, gitapos usab sa kagamhanang lokal, sa Task Force Bangon Marawi ug sa Office of the Presidential Adviser on the Peace, Unity and Reconciliation, nga kanhi OPAPP, ang pagsaulog sa Marawi Week of Peace sa may City Hall, kauban usab ang laing grupo sa mga IDPs.
Gisaulog usab sa gobyerno ang Ramadan sa may transitory shelter site sa barangay Sagonsongan kauban ang mga IDPs kinsa temporaryong nagpuyo na didto.
Sulod sa kampo sa 103rd Brigade, naghalad og bulak sila si Peace Secretary Carlito Galvez, Task Force Bangon Marawi City Chairman Eduardo Del Rosario ug Marawi Mayor Majul Gandamra alang sa mga sundalo ug mga pulis nga namatay atol sa pakig-giyera sa mga terorista aron mabawi ang Marawi City.
