Miabot ngadto sa onse ka mga ihalas o loose firearms ang gi-turn over sa kagamhanang lokal sa lungsod sa Taraka sa Lanao del Sur, niadtong Lunes, Marso 25, ngadto sa Philippine Army.
Ang turn-over ceremony gitambongan ni Taraka Municipal Mayor Nashiba Sumagayan, kinsa maoy mitabang sa pagkumbinsi sa mga tag-iya nga ipang turn over ang maong mga armas, matud pa ni LtC. Edgar Allan Villanueva, commander sa 49th Infantry Battalion.
Ang 49th IB maoy nagdawat sa maong mga ihalas nga armas nga gilangkuban sa caliber .50 mm Barrett sniper rifle, M16, AR15, 12 Gauge shotgun ug pito ka mga handguns.
Matud pa ni Col. Romeo Brawner, Jr., commander sa 103rd Infantry Brigade, nga samtang nagpadayun ang ilang operasyon batok sa Dawlah Islamiya, nagpadayun usab ang militar sa pagtabang sa mga local government unit, sa pagpa-turn over sa mga ihalas nga armas sa matag dapit.
Mapasalamaton usab ang Armed Forces of the Philippines ngadto sa katawhan sa Lanao del Sur sa padayun nga pagsalig sa militar nga motabang sa pagpatunhay sa kahusay ug kalinaw sa probinsiya.
Si Brigadier General Roberto Ancan, commander sa 1st Infantry Division ug commander sa Joint Task Force Zampelan (Zamboanga Peninsula and Lanao Provinces), midayer sa paningkamot sa tropa ug sa LGU sa Taraka sa malampuson nga pagturn-over sa maong mga armas.
Ang pagtinabangay, matud pa, dakung tabang sa pag-angkon sa kalinaw ug kalamboan sa probinsiya nga sakop sa area of operation sa 1st ID. (Divina M. Suson)
