Hangtod karon nalang ang gihatag nga higayon sa Commission on Election sa mga kandidato sa National Level nga panglangkaton ang ilang tagsa-tagsa ka mga illegal campaign materials, ilabi na hangtod karon anaa pa gihapon gipangsab-it sa bisan asang lugar bisan paman dinhi sa dakbayan sa dipolog ug sa tibuok probinsya sa Zamboanga del norte.
Gitin-aw ni Comelec Spokesman James Jimeneznga sa Pebrero 15, 2019 adlawng byernes ilang ipatuman ang Oplan Baklas nga kung diin ang tanang illegal nga campaign materials nga nagkatag, kuhaan nila ug hulagway, idokumentaryo ug langkaton.
Una na nang gibutyag ni Jimenez nga kung makuhaan nila ug litrato ang mga campaign materials nga nagkatag sa mga dili designated area aduna silay basehan kun si kinsa ang ilang pasakaan ug kaso para sa election offense.
Dili lamang matod pa mga nagkatag nga campaign materials ang mamahimong kalapasan sa kandidato kundili posible usab ang vote buying o bisan paman ang sobra nga gasto nga nakalapas kini sa Omnibus Election Code.
Moagi matod pa sa saktong proseso ang mga reklamo nga ilang madawat batok sa mga kandidato apan kun mapamatud-an nga guilty sa election offense ang gireklamong kandidato, pwede kining ma preso, magmulta, ma disqualify o bisan unsang kombinasyon sa bisan asa sa tulo ka mga nag unang silot.
Naglaom usab ang Comelec Zamobanga del norte nga tangtangon na karong adlawa sa mga national candidate ang ilang campaign material dinhi, ug kun ang mga supporter ang nagpakatap sa maong mga material giawhag sa COMELEC nga tangtangon na ug dili na magpaabt nga ang taga comelec pa ang mo langkat.
