General Santos City—Hingpit ng gipasaka sa Piskalya kagahapong adlawa, Lunes, ang kaso gitawag nga “Theft of Minerals” kon pagpangawat og mineralis og uban pang kasupakan sa Republic Act Number 7942 kon Philippine Mining Act of 1995 og Republic Act Number 7076 o Peoples’ Small-scale Mining Act of 1991, batok sa mga indibidwal nga nagmina og bulawan sa Sitio Banawag, Barangay Tablao, lungsod sa Kiamba, nga gikamatay sa duha ka minero.
Kini ang gikumpirma ni Police Chief Inspector Rey Salgado, ang chief of police sa Kiamba Municipal Police Station. Pwedeng mabilanggo sulod sa unom (6) katuig ang mga nasangpit. Anaa sa otsyenta (80) ka tiil ang gilawmon sa bangag nga gikalot sa mga minero. Og gani, suffocation, wala kaginhawa samtang naa sa ilalum, ang ilang gikamatyan og gikaluya, nga puros residente sa Malandag, Malungon, nahitabo niaging semana, Setyembre dise-syete (17).
Giguba na sa mga kapulisan ang giminahan nga nahimutang sa pinakasuok nga lugar, boundary na sa Kiamba og Maitum, og dakong karatula na ang gibutang aron subling pahimangnuan ang mga katawhan. Anaa sa upat (4) ka indibidwal ang gikasuhan kagahapon sa Fiscal’s Office.
Segun ni Nemrad Butil, ang supervising environmental management specialist sa PENRO Sarangani, sinsiro og dili muhunong ang lokal nga gobyerno sa kampanya batok pagpamutol og kahoy og pagmina ilalum sa Sulong Kalikasan program ni Governor Steve Chiongbian Solon kauban sila Senador Manny og Congressman Ruel Pacquiao, Vice Governor Elmer De Peralta, mga board member og mga mayores. Walay laing tinguha kundili ma-protektahan ang kinaiyahan og maluwas ang kadaghanan sa kalamidad og katalagman subay na usab sa kamanduan ni Pangulong Rodrigo Duterte.
Nag-awhag na lang sila Butil og Salgado nga padayong suportahan sa komunidad ang mga kapulisan, kasundaluhan og mga local official pinaagi sa paghatag og impormasyon.
Otsyenta (80) porsyento sa nahabiling lasang sa Sarangani Province ang anaa sa Kiamba og Maitum, gitawag nga Mount Busa, maong hugot kining giampingan. Watershed kon tinubdan kini sa mga dagkong sapa. Bisan nag-El Niño na ang kadaghanan, apan ang Kiamba og Maitum ang nag-sige rag ulan. (News From: Governor’s Office of Sarangani Province)
