Sarangani Province—Pulos kalipay ang gipamahayag sa mga kanhing myembro sa New People’s Army kon NPA sa ilang pagbalik sa sabakan sa gobyerno sa probinsya sa Sarangani.
Segun sa usa ka ni-surender nga nag-edad na karog kwarentay-syete (47) anyos, katorse (14) pa lang ang iyang edad dihang nisulod kini sa kalihukan. Dako matud pag kalainan ang pagpuyo sa patag kaysa sa bukid maong ni-desisyon kining mukanaog na lang. Dakong bintaha matud pa nga magpuyong malinawon, makakaon og makapahuway og sakto, may trabaho pang ga-sweldo matag adlaw.
Usa lamang sya sa walo (8) kabuok mga kanhing rebelde nga bag-uhay lang nakadawat og mga benipisyo sa gobyerno, kasagaran gikan sa mga kaigsoonang lumad.
Matud ni Col. Adonis Bajao, ang labaw sa 1002nd Brigade Philippine Army, higayon na kini sa mga nahisalaag sa dalan nga paminawon ang padayong panawagan ni Pangulong Rodrigo Duterte og sa lokal nga gobyerno nga mubaba na. Aminado ang labaw sa 1002nd Brigade Philippine Army nga sa musunod nga mga tuig, magpabilin ang kalinaw og kalambuan sa tibuok Sarangani Province tungod na usab matud pa sa maayong mga programa og proyekto sa LGU nga makapang-engganyo pa sa pag-surender.
Una ng gihingusgan ni Governor Steve Chiongbian Solon nga ablihan ang kabukiran aron musulod ang kalambuan, sama na lang sa padayon nga pagpasemento sa mga provincial og farm-to-market road og ang paghatag panginabuhian sa panguma ilalum sa SAAD program.
