Taghangyo koman nan mga kadagkoan sa City Sanitary Division nan City Health Office, na e implementa pagdajaw an bag-o nila na programa na ‘Zero Waste Program’ para sa 54 ka mga Barangay sa tibuok syudad nan Surigao, kun diin nagmando sa tanan mga kapitan sa syudad na imonitor an tagsa-tagsa ka mga panimayay para hibaw-an kon may mga kasilyasan ba ini sila sanan septic tank. Hilabi na an mga bayay na suod sa dagat o sa sapa. Sa gihimo na consultative meeting di pa lamang dugay kaiban an mga kapitan sa barangay sa syudad, gibutyag nan hepe sa City Sanitary Division na si Yolly Gillo, na aprobado sa tanan mga kapitan an ila programa para sa kalimpyo isab sa ila mga tagsa-tagsa ka komunidad. Dugang pa ni Gillo, jaoy premyo sa tanan mga kapitan kun maimplementa nila an ila programa sa kasilyas sanan sa septic tank, human nila e evaluate an mga Brgy sa dili pa mahuman an tuig. Pahimangno isab ni Gillo sa katawhan na magpabilin maglimpyo sa tagsa-tagsa ka mga tugkaran sanan tudloan isab an mga bata na mogamit sa kasilyasan dili sa biskan hain na lugar. Kay an lipa sa palibot pwede na magdaya nan sakit sa katawhan hilabi na pag-makontamina an lipa sa tubig. Nagsaad isab si Gillo, na ila imonitor an tanan brgy sa syudad apil sa mga isla para masiguro kun may public toilet sab sila sa ila mga brgy. Sa kasamtangan, jaoy pipila ka brgy hilabi na dire sa syudad an way mga kasilyasan tungod sa pagdagsang nan inin mga informal settlers .( RadyoMaN Winstons Ensomo)
