General Santos City–Managlahi ang nahimong reaksyon sa tulo ka mga Barangay opisyal sa dakbayan kalabutan sa hisgutanan kung uyon ba sila nga isapubliko ang mga pangalan sa mga artista nga anaa sa drug watchlist sa Pdea.
Sumala pa nilang Barangay Kagawad Herman Siodora sa Baluan og Kagawad Bobby Acharon sa sa barangay West nga dili sila uyon nga isapubliko ang mga panaglan sa mga artista nga anaa sa listhan gumikan kay gikinahanglan pa og lawom nga pagsusi kung tinuod ba gayud nga lambigit ang mga nasampit sa illegal nga droga.
Dugang asoy sa duha ka opisyal nga gikinahanglan usa nga mapasakaan og kaso aron dunay ebidensiya nga magpamatuod nga kining mga tawhana nga naa sa ilang listahan tinuod gayud nga lambigit sa droga og dili tumo-tumo lang nga meresulta sa pagkadaot sa kredibilidad sa usa ka tawo.
Samtang pagbutyag usab sa barangay kapitan sa Apopong nga si Paolo Natividad nga kinahanaglan gayud nga isapubliko ang mga pangalan nga anaa sa drug watchlist sa Pdea ma-anaa man sa publiko o sa pribado basta kalabutan sa droga aron nga ma-aware ang katawhan sa ilang iligal nga gimbuhaton.
Nagtuo usab ang maong kapitan nga posible duna poy mga artista nga lambigit sa droga ilabi na sa panahon karon nga bisan pa man nga hugot na ang kampanya sa gobyerno batok droga anaa pa gihapon ang presensiya sa droga sa nasod.(Reynald Timario)
