TACLOBAN CITY – Pagbantay ha seguridad, ini yana an gin-aandaman han mga
kapulisan han Tacloban ilabi na nga nagtitika-apiki na iton Semana Santa.
Ha interview han RMN kan PCInsp. Rex Cantillep, Deputy City Director for
Operations, sisiguraduhon nira iton safety han katawhan, gin-andaman na
liwat daw hiton mga kapulisan nga maghatag hin public safety services ha
publiko.
“Yana nga umarabot nga March 25-April 1, subay hini an amon functions nga
magkakaada kami hin public safety services like provides assistance to
motorist, commuters and general public. Intensified security patrol, patrol
vest and traffic management para magkamayada kita maupay nga pagtravel.”
Pagtikang han Semana Santa, naka-alert status na an mga kapulisan sanglit
siring ni Cantillep, bawal an umabsent.
“We are on alert status so magkakaada kami hin 100% attendance.”
Yana nga Semana Santa, 25 nga kapulisan an nakabantay ha Calvary Hill han
nula-tula, 10 naman ha Guadalupe church, 10 liwat ha Blessed Sacrament
church ha Tigbao Diit, 24 naman nga pulis ha Calvary Hill han Brgy. Siren,
4 naman ha Tacloban Port Area, tag upat liwat nga kapulisan ha mga malls,
10 ha Our Lady of Lourdes church, 15 liwat ha Our Lady of Miraculous Medal
ngan Sto. Nino church, 10 naman ha Fatima church ngan 15 ha Sacred Heart
church.
Nakabantay daw liwat an swat teams ha pira nga parte han Tacloban.
Para ha publiko, iginbabawal an pagdara hin mga magtarom nga butang, pusil
ngan mga makahurubog nga irimnon.
Siguraduhon liwat nga naka-upay pag sarado ngan nakalock iton purtahan
antis gumawas ha iyo panimalay.
