TACLOBAN CITY – Ginpa-uranan hin bala han pusil an mga kasundaluhan han 87th infantry battalion Ha Brgy. Can-Aponte San Jose De Buan, Samar dida han Lunes, Marso 18.
Subay han report tikang ha Police Regional Office 8, gintutuuhan nga mga myembro han New People’s Army (NPA) an nagpapaluyo hini nga harrassment.
Nagdudumara daw la hin community support program an militar ha nasabi nga barangay han tigda nala hira nga pabuthan.
Samaran hi PVT. Ronald Alutang Jr., samtang ha report, waray nahipatik nga samaran o casualty ha grupo han mga rebelde.
Dayon naman nga gindara ha hospital an samaran nga sundalo ngan yana in nagpapadayon hiton iya pagpatambal.
Mahugot naman nga ginkokondena han Philippine National Police (PNP) ngan Philippine Army an natabo nga insidente.
Nagpapadayon naman an hot pursuit operation han mga otoridad kontra ha mga rebelde.
