Ginpaidalum sa random drug test sang PNP Crime Laboratory ang 47 tanan ka pulis sang intelligence unit sang ICPO, City kag Station Drug Enforcement Units agud masiguro nga drug free ang ila mga operatiba.
Suno kay ICPO Spokesperson Sheila Mae Sangrines, nagpatawag sang sinapol ang Chief of Operations kag Chief of Investigation sang ICPO sa nasambit nga mga operating units sang sorpresa nila nga gin-anunsyo nga may pagahiwaton nga Random Drug Testing.
Wala naman sang may nagpamalibad nga pulis nga maghatag sang ila urine sample sa PNP Crime Laboratory.
Gin-athag ni Sangrines nga wala sila sang ginadudahan nga pulis nga nagagamit sang droga bangud ang Random Drug Testing kabahin lamang sang internal cleansing program sang Iloilo City Police Office.
Sa karon, ginahulat na lang sang ICPO ang resulta sang ginhiwat nga random drug testing.(sspunay)
