Aduna nay kalambuan matud pa sa kapolisan mahitungod sa kasong pagpatay sa presidente sa USTP kun University of Science and Technology of Southern Philippines nga si Dr. Ricardo Rotoras. Gikumpirma karon sa mga imbestigador nga aduna silay nakuha nga CCTV camera recording sa mga suspetsadong killers ug sa getaway vehicle niini.
Matud pa ni Chief Insp. Mardy Hortillosa, spokesman sa Cagayan de Oro City Police Office, nga ang maong recording ang gkan sa usa ka closed circuit television system nga nakuha sa mga pulis human sa pagpamusil niadtong Dec.2 sa gawas sa panimalay sa mga Rotoras sa upper Carmen.
Subay niini, bisan pa man nga medyo hanap ang maong kopya, gipaningkamutan na karon sa mga otoridad nga patin-awon ang kuha ug nga basi sa footage niini, mitakdo gyud kini sa mga statement sa mga witness. Kahinumduman nga adunay nakakita ug mga suspetsadong tawo sa sagbutang likod sa balay sa mga Rotoras sa Golden Glow North subdivision dool sa koral niini.
Dugang pa ni Hortillosa nga gipaningkamutan na usab karon sa mga kapolisan nga abrihan ang cellphone ni Dr. Rotoras aron pagkuha sa dugang pang impormasyon nga makatabang pagsulbad sa maong kaso.
Samtang daghan usab ang mitambong sa lubong ni Dr. Rotoras padulong sa Bulua area nga nakahimo pa ug traffic jams sa CM. Recto avenue hangtud Kauswagan gumikan kay nakasabay usab kini sa kapistahan sa Bulua.
photo courtesy of RMN Aiza Mesias Enloran
