SYUDAD sang Iloilo – Dapat magpaidalum sa mandatory nga self-quarantine ang tanan nga mga Koreans nga maga-abot subong sa syudad sang Iloilo.
Ini paagi sa isa ka executive order nga mga ginpaggwa ni Mayor Jerry Treñas.
Suno sa alkalde may poder ang local government sa idalum sang local government code nga himuon ini sa idalum sang general welfare clause.
Nahibaluan nga gin-cancel man sang syudad ang permit nga ginhatag sa RUN for Jesus 2020 event sang religious group nga Ikuca bangud sang pamahaog sang COVID-19.
Ang religious group may simbahan sa Daegu City sa South Korea kun sa diin madamo ang nangin positibo sa ila mga myembre sa COVID-19.
Ang RUN ukon “revival unity for next generation for Jesus” pasakupan kuntani sang ginabanta 20,000 ka mga myembro nga ang iban gikan pa sa Daegu City kun sa diin may outbreak sang COVID-19.
Nahibaluan nga may 763 na ka confirmed cases sang COVID-19 sa South Korea kun sa diin may pito ka nagkaamatay bangud sang sakit.
