Roxas City, Capiz – Padayon ang panawagan sang talatapan sang Department of Social Welfare and Development(DSWD-6) sa mga local government units sa Western Visayas nga kun mahimo dalion na ang pagsumiter sang SAP liquidation report. Nahibaloan nga sa 133 ka local government units (LGUs) sa rehiyon sais, 84 pa lang ka LGUs ang nakapasa sang ila liquidation report angut sa distribution sang social amelioration program (SAP) cash grant suno sa DSWD 6. Ginpahayag ni DSWD-6 Director Maria Evelyn Macapobre, sang nagligad pa nga May 27, 2020 ang gintalana nga deadline sa tagtaganay sang SAP. Bangud sini, nagahingyo siya sa mga LGU nga magpasa na sang ila liquidation report agud indi ma-delay ang pagpanagtag sang second tranche sang SAP pay-out. Sa bilog nga rehiyon, 6 ka LGU sa Aklan ang nakapasa na sang ila liquidation report; 18 sa Antique; 16 sa Capiz; 5 sa Guimaras; 24 sa Iloilo; kag 15 sa Negros Occidental. Importante suno kay Macapobre nga makapasa gilayon ang LGU sang liquidation bangod ang mga papeles liwat nga iga-ivalidate sang DSWD-6 kag ipadala nila ang ‘first clean list’ sa DSWD Central Office. Suno kay Macapobre, ang sobra nga kwarta dapat ibalik sang LGU sa DSWD 6.
