TACLOBAN CITY – Ginpanruba an nakumpiska nga 99 nga timbangan tikang ha magkadurudilain nga merkado ha Tacloban, ini in kaparte han crackdown han City Government kontra ha mga nanlilimbong nga paragbaligya.
Mayada man gud ordinansa an syudad, ini an City Ordinance No. 2008-10-71 nga kinahanglan kompiskahon an mga limbungan nga timbangan.
Sumala kan Market Superintendent Bernardo Villarante, ini nga ira nagin pitad in para protektaran an mga consumers tikang ha mga nanlilimbong ngan maundang na an mga vendors nga magbuhat hin illegal.
Kadam-an ha mga nakompiska nga timbangan in tikang ha fish section han merkado publiko han Tacloban.
Dugang nga pamahayag ni Villarante, mayada maximum penalty nga P3,000 ngan revocation han business permits an mga vendor nga magbubuhat hini.
Ngatanan nga timbangan in kinahanglan rehistrado ngan mainspeksyon han Market Office Operations nga mayada P200 nga bayad ((PHP 150 –calibration free ngan PHP 50-sticker fee)
Para makasigurado nga diri lilimbungan an mga consumers in kinahanglan ig-check kun mayada sticker han City Government an timbangan. Mayada gihapon ‘Timbangan Ng Bayan’ nga makikit-an ha mga merkado para makasigurado nga sakto an katimbang han iyo ginpalit.
(Photo by Tacloban City Information Office)
