Davao City – Ubay-ubay sumala pa ka mga indibidwal ang nagpahigayon og rally atubangan sa buhatan sa Department of Education (DepEd)-XI karong adlawa, July 29, 2019.
Kini ang gikumpirma ni Jenielito “Dodong” Atillo, spokesperson sa DepEd-XI sa interbyu sa DXDC RMN Davao diin nagtuo kini nga naggikan ang nahisgutan sa Salugpungan diin sul-ob niini ang sinina sa mga lumad ug aduna pay bitbit nga mga bata.
Saysay ni Atillo nga ilang girespeto ang malinawong panagtigom sa nahisgutan ug pagpa abot sa ilang mulo labi na sa suspensyong gipahamtang sa mga tulunghaan nga gi-operate ug gipanag-iyahan sa Salugpungan Ta’tanu Igkanugon Learning Center Inc. (STTILCI) sa tibuok rehiyon.
“So far, okay man, wala may problema. And then peacefully they dispersed and they were able naman to somehow send their message to the Department of Education,” saysay ni Atillo.
Apan nanawagan usab ang tigpamaba sa DepEd-XI ngadto sa Department of Social Welfare and Development (DSWD) nga mahatagan og pagtagad ang mga kabataan nga giapil-apil sama sa maong mga panagtigum.
“Kinahanglan sigurong tan-awon pud sa DSWD or CSSDO ang sitwasyon o kahimtang sa atong kabataan because we all know that children are not allowed really in the ticket line or in the rally line para duyugan ang mga katigulangan sa pagpasibaw sa ilang mga issues,” tataw ni Atillo.
RadyoMaN Kirby Manzon
