Davao City – Nagtuo si Davao del Norte (DavNor) Acting Vice Governor Flopone “Popop” Catalan nga gigamit lamang ang mga lumad sa pagbarikada sa kapitolyo sa Davao del Norte nga nahitabo human nga gipahamtangan og 60-day preventive suspension si DavNor Governor Edwin Jubahib.
Sa press conference, gisulti ni Catalan nga gigamit lamang ang ka-inosente sa mga lumad nga wala nasayud sa tinuod nga nahitabo ug dali lamang nga makumbinsi.
“Gibutang sila sa sitwasyon nga gigamit ilang pagka-lumad, ang ilahang kakulangan sa impormasyon aron nga magbarikada dinha. Kung gitabangan ni Gov. (Edwin Jubahib) ang lumad, ang pangutana, nganong lumad lang may naa dinha? Asa man diay ‘tong tao nga natabangan pud sa gobernador?,” saysay ni Catalan.
Nanawagan usab ang opisyal ngadto sa National Commission on Indigenous Peoples (NCIP) nga mutingog ug aksyonan ang paggamit sa mga lumad, una pa man magbaton og komosyon o madamay ugaling adunay mahitabong insidente.
RadyoMaN Kirby Manzon
Facebook Comments
