Mga lumulupyo sa Sarangani Province gipahimangnuan sa muabutay nga bagyong Vinta

Saranghani Province—Nagpasidaan karon ang Provincial Disaster Risk Reduction and Management Office kon PDRRMO Sarangani sa muabutay nga Bagyo Vinta nga muigo sa Surigao-Caraga og Davao Region nga aduna nay natalang gikusgon kagabii nga 90 kilometer per hour.

Segun ni Robert Lubonting, ang operation officer sa PDRRMO Sarangani, dako nga unos ang lauman aning ika-baynte-dos (22) nga bagyo nga nisulod karong tuiga nga sigurado matud pang maka-apekto sa tibuok isla sa Mindanao, mu-landfall karon ng adlawa, adlaw nga Byernes.

Dili angay mukumpyansa tungod kay mas kusog matud pa kining Bagyong Vinta kaysa sa nihapak bag-uhay lang nga Bagyong Urduja sa Biliran, Leyte. Kadtong Bagyong Paolo nga niigo niaging Oktubre sa may Visayas area ang nagpalihok pa sa kadagatan sa Sarangani Bay bisan sa gilay-on na niini hinungdan nga daghang panimalay og mga bangka ang nangaguba.

Signal No. 1 na sa kasikbit nga probinsya sa Davao del Sur samtang Signal No. 2 sa Davao del Norte.

Ang mga lumulupyo sa kabaybayunan gikan sa Maitum, Kiamba, Maasim, Alabel, Malapatan lahos sa Glan ang gipapangandam ng magbinantayon sa mga dagkong balod, dili na manglawod ang mga mananagat, samtang dili usab magkampante ang Malungon sa mga pagbaha og pagdahili sa yuta tungod sa kakusog sa mga pag-ulan.

Matud pa ni Lubonting, naka-blue alert na sila human sa kamanduan ni Governor Steve Chiongbian Solon, nagpasabot nga baynte-kwatro (24) oras ng nagbantay ang mga rescue team og emergency operation center sa probinsya, munisipyo og barangay, matag unom (6) ka oras usab nga ga-monitor gamit ang mga radio handset og mga himan sa komunikasyon sa pito ka munisipyo, og nakaandam na ang mga rescue equipment. Katugbang sa mga rescuers ang mga volunteers sa I.B.D.F. kon Integrated Barangay Defense Force og mga barangay health workers.

Aron andam sa unsa mang kalamidad og katalagman, namahayag ang PDRRMO Sarangani nga i-ready sa kanunay ang “grab-and-go emergency kit” kasudlan sa mga pagkaon og tambal, lakip na ang mga importanteng dokyumento.

Wala man nag-rekomenda sa preemptive o forced evacuation apan gustong ipadangat nila Governor Solon, Senador Manny og Congressman Ruel Pacquiao, Sangguniang Panlalawigan og mga mayores nga pirmehon ang pagka-alisto sa mga katawhan. (News from: Governor’s Office of Sarangani)