General Santos City—Dili na kinahanglan pa ang pagbutang ug tape sa mga buka sa giisyong pusil sa mga pulis alang sa pasko ug bag-ong tuig. Kini ang gihingusgan ni Police Chief Inspector Aldren Gonzales- tigpamaba sa Police Regional Office 12.
Sumala ni Gonzales nga walay hinungdan kung butngan pa ug tape ang mga armas tungod ang ubang mga pulis duna may kaugalingong mga armas nga mahimo gihapon nilang gamiton sa pagpabuto kung ilang gustohon.
Gumikan niini dili matud pa garantiya ang muzzle taping aron masigurong walay pulis nga magpabuto ug pusil sa pasko ug bag-ong tuig.
Dugang pamahayag ni PCI Gonzales nga mismong ang mga kadagkoang opisyal sa kampo krame ug si pangulong Rodrigo Duterte posibleng nakahuna-huna usab nga walay hinungdan ang pagbutang ug tape sa mga buka sa pusil sa mga pulis.
Kung kahinumduman nga sa nakalabayng semana unang gipahigayon ang muzzle taping sa mga pulis sa kampo lira apan gilayon kining gipatanggal gumikan na usab sa kamandoan gikan sa higher headquarters.
Kalabot niini nagpahimangno si pci Gonzales ilabi na sa mga naghupot ug armas nga dili magabusar inay mutuman sa balaud aron walay mahimong problema. Kahibaluan nga usa sa ginakabalak-an panahon sa pagsugat sa pasko ug bag-ong tuig mao ang mga saag nga bala nga peligrosong makamatay. (Jordan Britos)
