Ubay-ubay nga mga mag-uuma sa probinsya sa Sarangani kasagaran mga lumad ang hilabihan ang pagpasalamat human sila nahimong benipisyaryo sa programang SAAD kon Special Area for Agricultural Development.
Wala na matud pa sila namoblema sa matag adlaw nila nga pang-konsumo, ang pagpa-eskwela sa ilang mga anak, og bisan na ang pagpaayo sa ilang mga panimalay, lakip na ang pagpalit og kaugalingong appliances. Gani, ang uban mubalibad na sa bugas nga NFA tungod kay bastante na sila sa suplay sa upland rice og humot matud pang kaonon.
Nigawas sa nahitabong ebalwasyon nga nahimong SAAD top producer sa organic upland rice sa Sarangani Province ang lungsod sa Maitum, samtang ang Malungon ang top producer sa OPV o open-pollinated variety sa puting mais, og ang Maasim ang top producer sa mga assorted vegetables o mga gulayon. May pakapin pa kining livestock pinaagi sa pagbuhig mga pato og kanding. Gitutukan ang upland rice tungod kay makasugakod kini sa tumang kainit sa panahon.
Og tungod sa maayong resulta, gihimong P100 Milyon ka pesos nga pondo ang gihatag nila Pangulong Rodrigo Duterte og Agriculture Secretary Manay Piñol ngadto ni Governor Steve Chiongbian Solon alang sa Sarangani SAAD program naka-benipisyo ang trayntay-syete (37) kabuok beneficiary upland barangays. Apil na niini ang mga farm machineries, wala pay apil hinuon, ang mga ayuda sa Department of Agriculture Region 12 nga direkta na nilang gihatag sa mga mag-uuma.
