Mga mag-uuma sa Tagbina naka benipisyu sa livestock program sa DA
Ang DA – Caraga, pinaagi sa Livestock Program ug sa koordinasyon sa Tagbina Research Station, mi turnover sa Php4.5 milyones nga kantidad sa poultry project ubos sa Bayanihan Act II ngadto sa lain-laing mga asosasyon sa mga mag-uuma sa Tagbina, Surigao del Sur niadtong huwebes Nobyembre 11, 2021.
Ang turnover ceremony gipangulohan ni Regional Executive Director (RED) sa DA-Caraga, Engr. Ricardo Oñate Jr. uban ni Regional Technical Director Rebecca Atega. Ang pondo alang sa poultry project nga nagkantidad og P4.5M gigamit ubos sa DA-Caraga Livestock Program aron makapalit ug free-range nga manok ug para sa pagtukod sa Native Chicken Multiplier Farm, nga gilusad sa Tagbina Research Station sa probinsya sa Surigao del Sur.
Si Livestock Program Coordinator Jekem Sanchez niingon nga ang matag benepisyaryo maka-avail ug 100 ka free-range nga manok ug duha (2) ka sakong feeds nga gi-sponsor sa B-MEG. Tumong niini nga masuportahan ang mga mag-uuma sa ilang panginabuhian o mga kalihokan nga makamugna og kita.
Gawas sa manok, aduna usab mga seedlings sa utanon nga gipang-apod-apod ngadto sa mga barangay sa Tagbina nga ilang gipangayo alang sa pagpatuman sa ilang programang Gulayan sa Tahanan.
