Idiritso sa mga quarantine areas nga naidentify sang mga banwa kag syudad dire sa probinsya ang tanan nga mga taga-South Cotabato nga magpauli nga Overseas Filipino Workers ukon OFW`s kag iban pa nga mga naabtan sang lockdown sa iban pa nga lugar sa pungsod.
Suno kay South Cotabato Governor Reynaldo Tamayo Jr., kinahanglan pa nga magpaidalom sa 14 days quarantine ang tanan nga magpauli sa probinsya bag-o papaulion sa ila tagsa ka mga panimalay.
Ginhatagan punto sa gobernador ini agud nga malikawan nga maglapta ang coronavirus ukon COVID-19 sa probinsya kapareho na lamang sa natabo sa Cebu nga pipila ka mga seaferers nga nag-abot ang nagpositibo sa COVID-19 sang ginpaidalom sa rapid test bisan nga negatibo ang mga ini paghalin sa Metro Manila.
May-angot sini, suno kay Governor Tamayo ginsikyar na sang Provincial Health Office ang mga naidentify nga quarantine areas sang mga local government units sa diin ibutang ang mga magpauli dire sa South Cotabato.
Samtang handa man suno pa nga magbulig ang provincial government sa mga magpauli nga OFW`s kag iban pa nga residente sang South Cotabato nga naabtan sang lockdown.
Nahibaluan nga padayon na ang ginahimo nga pagproseso sang provincial government kag pipila kag mga concern nga ahensya sang gobyerno sa mga naabtan sang lockdown nga mga OFW`s kag mga pumuluyo sang probinsya sa iban nga lugar.
