SIPALAY CITY, NEGROS OCCIDENTAL – Mga ordinary nga mangingisda halin sa Dapitan City, Zamboanga del Norte ang mga tawo nga sakay sang pumpboat nga gin hold sa Sipalay City kahapon sang udto matapos ginsuspetsuhan nga katapo sang Maute.
Ini ang nag-gwa sa imbestigasyon sang Philippine Coast Guard matapos ginhold ang mga ini kag ginpaidalum sa imbestigasyon ang tag-iya kag kapitan sang fishing boat nga may tatlo ka crew.
Suno kay Bacolod Coast Guard Station Head, Lt. Commander Jimmy Oliver Vingno nga sa pagpangusisa naga-gwa nga buot kuntani magpadulong ang amo nga mga mangingisda sa Siaton, Negros Oriental deretso sa Mindoro apang nagdungka ini sa Sipalay agud nga magbakal sang gasolina.
Matapos ginhold, gilayon gin-abisuhan ang mga mangingisda nga magbalik na gid lamang sa Dapitan pero indi na maggamit sang ila bangka bangod delikado.
Ginkilala ang mga tripolante nga amo sanday Dante Alabata, Joven Tadiin, Vicente Sumalpong kag Jorel Calunod, mga Kristyano, tanan sang Dapitan City.
Naga-gwa man sa imbestigasyon nga rehistrado nga mga mangingisda sa local government sang Dapitan ang apat.
