Indi lang magapabilin sa pagtanom sa ila ulumhan ang mga mangunguma gikan sa 11 ka banwa sa Isla sang Panay.
Ini bangud nga ginabuligan sila sang Department of Agriculture kag Korea International Cooperation Agency ukon KOIKA nga mangin entrepreneurs paagi sa pagdala sa ila sa mga bumalakal ukon merkado sang ila produkto.
Kabahin ini sang third phase sang Panay island sustainable rural development project.
Sa iya mensahe sa ti-on sang duha ka adlaw nga Panay Island Local Food Festival and Tradeshow sadtong Byernes kag Sabado ginsiling ni DA Sec. Manny Piñol nga magalevel up na ang mga mangunguma gikan sa Iloilo, Capiz kag Antique.
Paagi sa programa nahatagan sang kahigayunan ang mga mangunguma nga madala ang ila produkto direkta sa mga consumers.
Matun-an man sang mga mangunguma kun paano nila makuha ang merkado sa ila mga produkto.
Kalakip sa mga nagpasakop amo ang mga mangunguma gikan sa mga banwa sang Libacao kag Madalag sa Aklan; Sebaste, Tobias Fornier kag Patnongon sa Antique; Jamindan kag Tapaz sa Capiz; kag Alimodian, Tubungan, Lambunao kag San Miguel sa Iloilo.
Sa sini nga mga banwa may gintukod man nga bayanihan tipon center ukon BTC maluwas sa San Miguel nga napilian bilang local food terminal.// via Joel Franco reports
Photo via Dept. of Agriculture
