Mga manok kag itlog sa Capiz hilway nga kaunon suno sa Provincial Veterinary

Roxas City, Capiz – Hilway sa gihapon nga kaunon mga manok kag itlog sa probinsya sang Capiz kag Panay Island, ini ang ginpahayag ni Dr. Leonel Abordo, Provincial Veterinarian.

Suno diri nga padayon nga nakaalerto ang lokal nga panguluhan sang Capiz kaupod ang mga municipal mayors kag municipal agriculturist sa mga kabanwahanan.

Ginpahayag dugang ni Dr. Abordo nga nagapatigayon na sang maid-id nga pagbantay kag monitoring ang Provincial Veterinarians Office kag Department of Agriculture pinaagi sa pagpahamtang sang mga personnel sa mga pantalan agud nga magpatigayon sang quarantine sa mga poultry products nagikan sa iban nga lugar, labi na gid sa Luzon.


Gina-alerto man ang mga nagapanag-iya sang mga poultry farm sa bug-os nga probinsya agud maghimo sang mga nagakigo nga tikang para malikawan ang paglapta sang bird flu virus matapos ang nangin outbreak sa Pampanga.

Suno pa sa kay Dr. Abordo yara pa gid lamang sa manok ang epekto sang bird flu virus sa Pampanga kag wala pa sang may nadiskubrehan nga epekto sa tawo.

Samtang yara sa gihapon sa normal ang baklanay kag presyo sang mga ginabaligya nga manok sa merkado sa Roxas City kag Capiz kun sa diin yara gihapon ini sa 130-135 kada kilo.

Facebook Comments