Mga manugbaligya it isda nagtuga it kinagamo sa namatyan, arestado

Kalibo, Aklan – Arestado rong ap-at ka mga persona matapos nga magtuga it kinagamo kabii sa sangka namatyan sa Sitio Ibog, Brgy. Old Buswang, Kalibo, Aklan.
Sa report it Kalibo PNP nga nakabaton sanda it tawag nga nagapangayo it police assistance angot sa nagtuhaw nga kinagamo sa lamay ni Rexiel Inserto @ Burnok it nasambit nga lugar.
Insigida nga ginrespondehan ag naga guwa sa andang imbestigasyon nga rayang si Roque Laserna Ricamonte, 25-anyos ag residente it Villa Salvacion, Andagao hay nagbisita sa namatyan.
Nag-abot man ro mga gina alegar suspek nga sanday Ryan Tayco Dela Cruz, 33-anyos, residente it Guinbaliwan, New Washington; Amante Protacio Malolos, 24-anyos it Martelino Sub. Andagao; Jonel Nalangan Briones, 34-anyos it Anadago ag Errol Zonio Zabal, 30-anyos it Purok 3, C. Laserna St., Kalibo tanan mga manugbaligya it isda sa Kalibo Public Market ag naobserbahan nga puro naka inum.
Tag una eon sanda sa namatyan rayang si Ryan hay ginpaeapitan si Roque dayon nga gumabot it siyaw ag binuno pero naka iwas raya ag nakadaeagan paguwa it baeay. May pag linagsan pang natabo hasta nakapanago si Roque.
Rayang si Errol nga gina alegar armado it baril ag si Ryan hay ginsinipa pa rong pwertahan it baeay hasta nga nasamad. Ginasugid pa gid nga rayang si Errol hay nagpaeopok it uwa masayuring calibre it baril it makaywang beses.
Sanda ra hay gin ampara it mga tawo sa lugar ag ko ulihi nagdaeaeagan sa uwa masayuri nga direksyon.
Ro nasambit nga hitabo hay nasaksihan mismo it live-in partner no Roque nga si Julina Tamondong kaibahan si Charina Inserto.
Ginaturo nga motibo hay bangud sa paghilisaan sa andang pagbaligya sa tindahan.
Sa ginpatigayon nga follow up it mga kapulisan nadakpan rong mga suspek ag detained sa lock up cell it Kalibo PNP para sa pagpsaka it nagakaigong kaso.

Facebook Comments