General Santos City–Ubay ubay nang mga biktima sa Police Paluwagan Movement kon PPM Scam ang nagpasang-at ug kaso sa NBI-SARDO batok kang Sheila Grace Agustin kansa gitudlong nagpasiugda sa PPM sa Gensan.
Sumala ni Special Investigator 3 Jeffrey Mosqueda sa NBI-SARDO as 0f alas 3:00 ang takna sa hapon kagahapong adlawa anaa na sa 128 ka mga biktima ang nagpasang-at ug kaso sa ilang buhatan.
Gilauman usab ni Mosqueda nga posibleng madungagan pa ang maong ihap gumikan aduna nay nag inquire sa ilang buhatan apan wala pa nakapasang-at tungod kulang pa silag mga dukumentong angayang isubmitar.
Dugang pagbutyag ni Mosqueda nga unang mireklamo sa ilang buhatan ang usa ka investor nga nag invest matud pa ug 400 million pesos. Gikan matud pa kini sa mga tawong iyang naawhag nga mag apil sa maong investment Scheme.
Sugod usab niadtong Lunes hangtud kagahapong adlawa, dagsa na ang mga reklamante ngadto sa ilang buhatan.
Sa kinatibuk-an mukabat ngadto sa kapin 750 Million pesos ang nawagtang matud pa gikan sa 128 ka mga investor wala pay labot niini ang uban pang mga nagreklamo na sa ilang buhatan apan wala pa makapasang-at ug kaso.
