General Santos City—signit sa Search Operation sa PDEA-12 inubanan sa Pikit Municipal Police Station, Cotabato Police Provincial Office (CPPO), CPPO-Provincial Intelligence Branch, Cotabato Police Mobile Force Company, Regional Public Safety Company, ug uban pang unit sa kapulisan ang gikaingong mga miyembro sa Bawan Drug group sa Brgy. Batulawan, Pikit, North Cotabato niadtong nakalabayng adlaw.
Kadlawon dihang nasikop si Johaina Labarios, legal age, minyo, residenti sa samang lugar human nga nakuhaan ug (13) ka pakete sa gikatahapang shabu. Alas 7:10 sa buntag dihang gihimo sab ang ronda sa panimalay nilang Samer Tanden Alias Samir, legal age, minyo ug Baina Tanden, legal age, lumulupyo sa samang lugar kansa nakuhaan ug (14) ka pakete sa gituohang shabu.
Alas 8:00AM sa buntag dihang gironda usab ang balay ni Alias Kadil Pagadatan ug Alias Bakwit, kansa nakasibat human nga namatikdan ang presensya sa raiding team sa PDEA ug Kapulisan. Nakuhaan ug (18) ka pakete sa gituohang shabu ang balay sa mga nasangpit.
Sumala sa PDEA nga ang BAWAN drug group, usa ka organized big time drug group nga naga-operate sa Pikit ug Kabacan, North Cotabato ingon man sa mga kasigbit nga munisipyo ug sa probinsya sa Maguindanao.
Kasong kalapasan sa Section 11 (Possession of Dangerous Drugs), Article II sa RA 9165 (Comprehensive Dangerous Drugs Act of 2002”) ang ipasang-at nga kaso batok sa mga nasangpit karong adlawa.
