Gipasabot sa Department of Education (DepEd) ang hinungdan kung nganong gi-postpone ngadto sa Oktubre 5 ang bag-ong petsa sa tingtungha sa mga pampublikong tulunghaan sa nasud.
Mahinumduman nga gikan sa Agosto 24, gibalhin sa DepEd sa Oktubre 5 ang school opening sigun sa nahimong pagtagad sa buhatan ni Pangulong Rodrigo Duterte sa ilang rekomendasyon nga ipalabay una ang school opening.
Sa interview sa RMN DXMB Malaybalay ngadto kang Dr. Randolph Tortola ang Schools Division Superintendent sa Bukidnon-Division, gibutyag niini nga gumikan kini sa implikasyon sa mga preparasyon para sa balik-eskwela sa mga naglihok nga modified enhanced community quarantine sa pipila ka mga siyudad ug probinsya.
Apan gibutyag ni Dr. Tortola nga kung madayon pa ang klase karong Lunes andam na ang probinsya sa Bukidnon.
Sigun ni Dr. Tortola nga bisan pa man ug mubalik na ang klase sa Oktubre 5, wala pa gihapoy mahitabo nga face to face nga klase subay sa mando ni Sec. Leoner Briones ug Pangulong Duterte tungod kay wala pay bakuna sa COVID-19.
Tungod sa pag-postpone sa klase karong Agosto 24 gibutyag no Tortola nga gi-hold una nila ang pag-apod-apod sa mga module materials nga nakatakdang sugdan unta ugmang adlawa.
Samtang gitugyan na usab sa DEPED ang katungod ngadto sa mga pribadong eskwelahan ang pag-desisyon sa pagbukas sa ilang klase.
Gipangayoan lang matud pa nila kini ug learning continuity plan nga maoy usa sa basehan sa pag-abli sa ilang klase.
