Gipahibalo Provincial Committee on Repatriation of Locally Stranded Individuals sa probinsya sa Bukidnon sa pag panguna ni PCL ex-officio board member Atty. Oliver Owen “Baba” Garcia nga adunay kabag-ohan sa sweeper flights nga gihan-ay sa probinsya nga gilaumang adunay posibleng byahe karong adlaw’ng Dominggo, Hunyo 7, 2020 diin anaa sa 162 ang mamahimong pasahero niini.
Gipasabot niini nga sa nilabay nga mga adlaw og semana nahitabong adunay mga kabag-ohan sa byahe tungod usab sa mga bag-ong kamanduan gikan sa kaulohan nga kinahanglanang pagasundon labina sa mga gikinahanglang papeles og usab kun adunay mga nadawat nga mga report sa mga kunpirmadong kaso sa COVID-19.
Basi sa listahan, adunay naila nga 553 ka mga LSIs ang ginahan-ay nga ma byahe gikan sa Luzon sa pipila ka semana karon diin pinaka daghan niiini ana karon na istranded sa Metro Manila.
Tungod sa kadaghan nga moabot nga mga LSIs gikan sa Luzon og ma proteksyonan usab ang katawhan sa Bukidnon, mi disisyon ang komitiba nga ang tanang mangabot nga LSIs, moagi sa rapid testing sa dili pa kini e reles ngadto na sa mga kalungsuran og syudad diin didto na ipahigayon ang katorse-diyas nga pag kwarentina kanila.
Sa interview sa RMN ngadto kang Marilou Lapuz, ang team leader sa mga nurses sa BPMC Ligtas Covid-19 Center gibutyag niini nga usa kini ka kabag-ohan nga ilang gipatuman sugod karong Hunyo nga ipailawom sa rapid diagnostic test kon RDT kadtong mga mangabot nga LSI.
Mukabat matud pa sa 15 ka minutos ang pag-examine sa usa ka indibiwal diha sa BPMC.
