General Santos City—nanghimangno si Police Chief Inspector Jovenson Bayona, Hepe sa Police Station 1 ngadto sa katawhan nga musuroy sa Gensan City Oval Plaza dungan sa selebrasyon sa Tuna Festival nga likayan ang pagsul-ob ug mga mahalong alahas ug bantayan pag ayo ang mga mahalong gamit nga ilang dala sama nalang sa gadget ug uban pa.
Tumong aron nga malikayan nga mabiktima sa kawatan nga posibling mudagsa dungan sa pagdugok sa katawhan sa Oval Plaza dungan sa selebrasyon.
Aminado si PCI Bayona nga dili nila kayang bantayan usa-usa ang katawhan nga magsuroy suroy sa sentrong bahin sa syudad mao nga nanawagan nalang sila ngadto sa katawhan nga mahimong responsabli sa ilang mga gamit.
Samtang subling nanghimangno si Bayona sa katawhan nga likayan nalang usab ang pagdala ug mga butang nga gidid-an sulod sa Oval Plaza sama nalang sa hait nga hinganiban, pusil, bagpack ug uban pa.
Bawal usab nga musulod ang tawong hubog aron malikayan ang gubot. Nasayran nga ang Police Station 1 maoy nanguna sa seguridad nga gipatuman sa Oval Plaza gumikan anaa kini ilawom sa ilang Area of responsibility.
Gawas sa kapulisan gikan sa Police Station 1 adunay mga pulis nga gi-augment gikan sa Gensan City Police Office ug Police Regional Office 12. Anaa usab ang Joint Task Force Gensan kaabag sa PNP sa pagbantay sa seguridad alang sa selebrasyon sa Tuna festival.
Setyembre 1 ipahigayon ang Grand Opening sa Tuna Festival ug ang Culmination niini ipahigayon karong umaabot nga Setyembre 5, 2017.
