Malampuson nga natigayon kagahapong adlawa, adlaw nga Martes, ang Inaugural Session sa Sangguniang Panlalawigan sa probinsya sa Sarangani alayon sa bag-ong termino.
Matag usa kanila ang nihatag sa ilang inaugural speech isip kabahin sa ika-napulo kon 10th Sangguniang Panlalawigan unod ang mga handum, tinguha og mga programa sa musunod nga tulo (3) ka tuig subay sa komitiba nga posible nilang magunitan og sa direksyon nga gipahaluna ni Governor Steve Chiongbian Solon ilalum sa Sulong Sarangani flagship program kauban si Vice Governor Elmer De Peralta og sa suporta nila Senador Manny og Congressman Ruel Pacquiao.
Nihatag sa ilang inaugural address ang mga bag-ong board member nga sila Board Members Russel Jamora, Ephraim Galzote, Irish Arnado-Benola, Joseph Calanao, Corazon Grafilo og Dr. Tranquilino Ruiz. Anaa pud ang ikaduha na sa termino nga sila Board Members Jess Bascuña og Rosemarie Martinez-Sayo. Og ang mga last-termer nga sila Board Members George Falgui og Arman Guili.
Nipadayag usab sa ilang pag-welcome sa mga bag-ong kaubanan sila SK Federation President Board Member Reymar Dian, Liga ng mga Barangay President Board Member Tatang Paras, og si Board Member Ben Donato nga bag-uhay rapud nipungko isip IPMR/Indigenous People Mandatory Representative puli ni Board Member Fred Basino.
Samtang, nanumpa kagahapon si Malapatan Municipal Councilor Elizabeth Sambaga isip interim president sa PCL kon Philippine Councilor’s League, maong katorse (14) kabuok sila tanan karon nga mga regular og ex-officio board member nga naglangkob sa Sangguniang Panlalawigan sa Sarangani Province. Si Councilor Sambaga ang nihulip kang kanhing PCL President Calanao nga karon usa na ka regular board member samtang ang ilang kanhing PCL vice president ang mayor na karon sa Maasim nga si Mayor Zyrex Pacquiao.
Si Vice Governor De Peralta ang ulahing nihatag sa iyang inaugural speech kung diin gitagaan niinig bili isip amahan sa legislative department ang respeto, demokrasya, panaghiusa og pagtinabangay aron magpabiling lig-on og maayo ang ilang kinatibuk-ang performance.
Ang puros mga batan-on nga sila Board Member Jamora sa 1st District og Board Member Galzote sa 2nd District ang nakakuhag labing dako nga boto sa matag distrito, apan sa kinatibuk-an si Board Member Jamora ang senior board member. Gihingusgan ni Board Member Jamora nga magpabilin syang tulay ngadto sa iyang bayaw nga si Senador Pacquiao, og gidayig niini ang pagdumala nila Congressman Ruel, Governor Solon og Vice Governor De Peralta sa giabtan na karon sa Sarangani Province. Samtang, si Board Member Galzote ang todo-suporta sa Sulong Sarangani program nila Governor Solon.
Nausab na ang adlaw sa regular sesyon sa Sangguniang Panlalawigan sa Sarangani, matag adlaw na kining Lunes, alas dos sa hapon (2pm).
