MGA NAGABALIGYA SA BAY PARK SA NATIONAL HIGHWAY SA BARANGAY LAWAAN ROXAS CITY, WALA PA MAGHALIN

20
Roxas City, Capiz – Nagapakatig-a sa guihapon ang kadam-an sang mga negosyante nga nagabaligya kag nakasulod sa set back sang national highway road sang Barangay Lawaan, Roxas City.
Ini ang ginpahayag ni DPWH Capiz 1st District Engineering District, Engr. Randolfo Melosantos sang mapakig-angutan sang DYVR News Team.
Suno kay Engr. Melosantos ang bay park ang nagakadapat nga paga-gamiton sang mga motorista mag-parking kon maalangan sa dalan ukon mabutang sa trouble apang indi ini magamit bangud madamo sang pwesto sang balaligyaan kaangay sang butong, bulkitan kag litsonan sang manok.
Mahibaloan nga sang Nobyembre 7, 2021, ginpadangat na ini nga rekkamo sa talatapan ni Engr. Julius Abela kon sa diin ginpasalig sini nga iya gilayon nga paga-aksyonan kag padal-an sang nagakaigo nga sulat ang mga negosyante sa nasambit nga lugar.
Apang, tubtob subong wala sa guihapon maghalin ang kutob sa may pwesto sa set back sang highway road.
Dugang pa ni Melosantos, liwat sini nga padal-an sang “final notice” ang mga negosyante agud makahimos sila.
Ginpasalig man sini nga kon indi pa maghalin ang mga nagabalaligya, magapatigayon ang DPWH Capiz 1st Engineering District Office sang pag-abolish sa mga nakasulod sa set back sang national highway road.
Facebook Comments