Roxas City, Capiz – Pagamultahan ang sin-o man nga madakpan nga naglapas sa ginpapanaog nga Fisheries Administrative Order (FAO) 167-3.
Ini ang ginpahayag ni Fishing Regulations Officer 1 Mr. Roniel Fernandez sa interview sang news team. Suno diri nga mahimu nga mapriso ang magabayolar sang anum ka bulan kag isa ka adlaw tubtob anum ka tuig kag may multa nga P6,000 pesos.
Base sa R.A. 10654 ukon ang Fisheries Code, may yara sang P20, 000 pesos nga penalidad para sa magbayolar nga municipal fisherfolks samtang may consecutive penalties sa mga commercial fishers lakip na ang anum ka bulan tubtob anum ka tuig nga kapresuhan kag kanselasyon sang catch and fishing permit sang mga ini.
Sa madumduman nga gindeklarar sang sang Bureau of Fisheries and Aquatic Resources ukon BFAR ang 3-month Closed Fishing Season sa Visayan Sea humalin Nobyembre 15 sini nga tuig tubtob sa Pebrero 15, 2018. Base sa Fisheries Administrative Order 167-3 nga ginpapanaog sang Bureau of Fisheries and Aquatic Resources Regional Office 6, hugot nga ginadumilian ang pagpanakop sang mga isda nga Sardines, Herring kag Mackerel sa kadagatan nga sakop sang Visayas. Ini agud nga mahatagan sang panahon ang amo nga klase sang isda nga makapangitlog kaangay sang “lupoy,” “silinyasi,” linatsay” ukon “manansi” sa porsyon sang Visayan Sea. Ang sin-uman nga madakpan ang mahimu nga mapriso sang anum ka bulan kag isa ka adlaw tubtob anum ka tuig kag may multa nga P6,000 pesos. Igakanselar man ang catch and fishing permit sang mga ini. Samtang gindeklarar man nga ban ang pagpangisda sa kadagatan nga malapit sa Zamboanga Peninsula. Una diri, ginpatigayon sang nakaligad nga Nobyembre 15 ang seremonya para sa implemenstasyon sang Fisheries Administrative Order (FAO) 167-3 sa Bakhawan Cultural Center, Brgy. Bakhawan, Daanbantayan, Cebu kun sa diin gintambongan sang Philippine Coast Guard (PCG), Philippine Navy, Philippine National Police, PNP Maritime Group, Provincial kag concerned Local Government Units sang Iloilo, Negros Occidental, Cebu, Capiz, kag Masbate.
