TACLOBAN CITY – Eksklusibo nga nagpa interview an tinaglawas han Commission on Higher Education (CHED) Regional Office 8 ha RMN Tacloban kabahin han issue han mga natanggal nga estudyante ha Tertiary Education Subsidy (TES).
Sumala kan John Paolo Vega, Unifast staff han CHED R8, may mga natanggal tungod nga may mga estudyante nga mas deserving han ayuda han gobyerno.
“Nagdumara an CHED hin reassessment kun diin nakit-an namon nga may mga bag-o nga estudyante or first year college nga mas kinahanglan an ayuda” – Vega
“An TES po diri po hiya forever nga ngada hit maka graduate ka, TES grantee ka la gihap. Every year po nagdudumara kami hin reassessment ngan nakikit-an namon based ha monthly income han pamilya han estudyante kun kinahanglan nira han TES” – Vega.
Sanglit sumala kan Vega, usa nga prebelihiyo kun an usa nga estudyante in nasasakob ha TES program.
“Ginsisidngan po namon iton mga TES grantees nga pumalit kamo hin laptop, mga kinahanglan niyo ha pag-aram kay P40,000.00 gud ito sir Jake nga ginhahatag ha ira hiton gobyerno.” – Vega
“Mayada nahi-aabot ha amon nga reports nga an iba ginpapalit lugod hin maharalon nga cellphone, imbis nga pambayad lugod nira hit ira boarding house, ig gagastos kun mayada projects. Waray naman hira problema ha tuition kay free tuition na ngan free miscellaneous fee na” – Vega
Sumala kan Vega, mas damo yana nga tuig an napailarom ha TES nga mga estudyante. Dida han 2018, mayada 22,000 TES grantees. Yana naman nga tuig 2019, mayada 25,000 TES grantees an bug-os nga Region 8.
“Nakikita namon based han ranking han per capita household income ha Listahanan 2.0 kun mas nanginginahanglan an usa nga estudyante kontra ha usa.”
Nag-alotaga an gobyerno para han TES hin P900 million para ha mga estudyante han Region 8.
Ha ilarom han TES, gintatagan an estudyante hin P40,000.00 every school year kun hiya in naeskwela ha universities and colleges. Kun na-eskwela naman ha private school, P60,000.00 an hatag han gobyerno every school year.
