TACLOBAN CITY – Nadisgrasya an 13 nga pasaheros sakay han Grand Tours nga van ha Brgy. Palale, Sta. Margarita, Samar alas 3:40 kasangkulop han kulop.
Tikang ha Catbalogan City, Samar an mao nga van nga tipakadto unta ha Calbayog City, Samar.
Ginkilala an driver han mao nga Grand Tours nga van nga hi Marino Magos Obiena, 47 anyos, residente ha Brgy. Lemon, Capoocan, Leyte.
Ha Eksklusibo nga interview han RMN kan PO3. Vaisyl Jo Tarrayo han Sta. Margarita PNP, imbistigador han mao nga panhitabo, nahingaturog an driver samtang nadalagan an ira sarakyan rason han ira disgrasya, maupay nala ngani kay an iya sapit ha front seat nga usa nga bombero in ikmat ngan nahikabig an manibela.
“Ini nga driver han van in baga naka-idlip, maupay nala nga an usa nga pasahero nga taga BFP nga hi Bryan Loces nakanotice nga naka-idlip ngayan an ira driver. Iya ini ginkabig kay pagkita niya in mabubunggo na hira ha puno han mangga didto han may eskwelahan, iya ginkabig an manibela pero nawarayan na hin kontrol an sarakyan ngan didto na hira nahilabog ha mga kahumayan.”
Dugang ni PO3 Tarrayo ha nagin salaysay han driver, ika-tulo na nga biyahe han driver han Grand Tours tikang ha Tacloban tipakadto ha Calbayog ha usa la kaadlaw sanglit nahingaturog daw hiya dida han ira biyahe.
Upat nga pasahero an gindalagan ha Calbayog Hospital pero minor injury la an ira naangkon samtang an siyam nga pasahero in maupay nala waray makaangkon hin injury.
Nagkasarabot na daw an siyam nga pasahero ngan Grand Tours management nga diri nala hira magpapasaka hin kaso kontra ha driver pero ginhuhulat pa yana an desisyon tikang ha upat pa nga pasahero nga aadto ha Hospital.
Kun mapapasakahan, reckless imprudence resulting to physical injury an aatubangon nga kaso han driver.
