General Santos City–Gihingusgan ni Police Lt. Col. Teody Condesa, tigpamaba sa Sarangani Police Office nga alang kaniya duna gihapoy katungod ang mga akusadong miyembro sa PNP nga apil sa mga akusado sa Maguindanao Massacre nga una nang na-acquit sa kaso nga makabalik sa serbisyo.
Sumala sa opisyal nga ang pagwalay sala sa korte sa mga nasampit ang timailhan matud pa nga wala silay sala sa mangilngig nga krimen.
Gawas niana napriso na sila ug 10 ka tuig mao nga dapat hatagan sila ug higayon nga makabalik ngadto na sa serbisyo.
Dugang pagbutyag ni Police Lt. Col. Condesa nga alang kaniya walay problema kung mobalik sa serbisyo ang mga naakusahang police sa Maguindanao Massacre nga nahimong gawasnon.
Basta tibuok lang matud pa ang desisyon sa mga nasampit sa subling pagbalik sa serbisyo. Apan nagdepende gihapon matud pa sa higher headquarters kung sila dawaton hilabi na nga pipila kanila ang nagatubang gihapon ug kasong administratibo.
Nasayran nga sa 36 ka mga police nga apil sa mga akusado sa Maguindanao Massacre case, 17 lamang niini ang awtomatikong makabalik sa serbisyo isip police.
Maymay usab ni Police Lt. Col. Condesa sa mga nasampit nga police nga kung makabalik na sila sa serbisyo unta ibutang gyud nila sa ilang mga alimpatakan nga dili gyud mopagamit sa mga politiko o kinsa mang maempluwensyang tawo.
Sumala pa nga ang tahas sa kapulisan mao ang pagpanalipod sa katawhan ug tigpatuman sa balaod ug dili mamahimong itoy sa pipila ka gamhanang tawo.
