Mga presuhan han Region 8, nakaka-abat gihap hin rice shortage

78

TACLOBAN CITY – Inaabat gihapon ha mga presuhan dinhi ha Sinirangan Bisayas an kakulangan hin bugas.

Sumala kan JSupt. Manuel Chan Jr., Warden han Tacloban City Jail, han nakalabay nga duha kabulan, an mga jail officials in kinahanglan pumalit hin bugas ha private traders tunod nga delay an delivery han bugas tikang ha National Food Authority (NFA).

An mga presuhan ha ilarom han Bureau of Jail Management and Penology (BJMP) in nakakakarawat hin kada bulan nga supply han bugas tikang ha NFA.

Dugang ni Chan, mas dako an ira ginagastos tunngos nga an mga private traders in nag-umento han ira pagbaligya hin bugas.

Nakakapalit hin usa ka sako nga bugas an Tacloban City Jail hin bugas ha NFA ha presyo nga PHP1,500 pero yana nga pinapalit nira ha private traders hin nagkakantidad PHP2,000.

An mao nga presuhan in nakunsumo hin 300 tubtob 320 nga sako hin bugas kada bulan.

Mayada 1, 052 nga preso an Tacloban City Jail kun diin kada usa nga preso in nakunsumo hin 400 grams nga bugas kada oras na hin pangaon.

Assistant Regional Director gihapon hi Chan han BJMP Regional Office 8 ngan siring pa niya sugad gihapon iton nahihinabo ha mga presuhan ha bug-os nga Region 8.

Nangaro na hin bulig an BJMP ha NFA ngan gintagan hira hin patapod nga masosolusyunan an supply shortage ha mga presuhan.

Facebook Comments