General Santos City–Nagpabiling suspendido ang byahe sa tanang pampublikong sakyanan sa Gensan. kini ang gibutyag ni Jong Facurib, Terminal Administrator ning dakbayan.
Sumala niya nga tungod bawal pa ang border crossing, dili pa nila matugutan ang pagbyahe sa mga depampasaheruan nga sakyanan sama sa bus ug mga van.
Apan gi-angkon niya nga aduna silay mga PUV nga nasayran nga kawat-kawat nga nagapamasahero rason nga ilaha kining ginabadlong.
Dugang pamahayag ni Facurib nga adunay mga pribadong sakyanan usab ang naga-pick up ug pasahero padulong Davao ug ubang parte sa Rehiyon.
Pagpaklaro niya nga hugot ang ilahang ginahimo nga pagbantay sa mga checkpoint apan dili nila masayran kung ang tanang pribadong sakyanan nga naga-agi, pamilya ang ilahang sakay o pasahero.
Kalabot niini, nanawagan si Facurib sa publiko nga kung mamahimo dili gyud musakay ug mga pribadong sakyanan nga nagapamasahero.
Kini gumikan posibleng mabutang sa peligro ang ilahang kinabuhi tungod walay nasayud kung infected ba sa virus ang mga naunang sakay sa mga pribadong sakyanan.(LVR)
