General Santos City–Gipaniguro sa General Santos City Police Office nga luwas batok sa COVID 19 ang mga pulis nga gibutang sa mga nagkadaiyang checkpoints ning syudad kansa maoy pinakaunang personahe sa goberno nga musuta sa mga pasahero gikan sa ubang lugar pasulod sa GenSan.
Sumala pa ni Police Lieutenant Jose Marie Simangan ang Commanding Officer sa City Mobile Force Company nga matag usa sa iyahang mga sakop nga nagbantay sa Checkpoint ang adunay mga sol-ob nga protective mask ug may mga bitbit nga disinfectant aron nga maprotrektahan ang ilang kaugalingon.
Nasayran nga human nagpakanaog ug executive order si Mayor Rivera diin unod niini ang pagpatuman ug Preventive Restriction on non essential travel ug preventive suspension on non essential travel, mas gipahugtan sa kapulisan ang ilang pagpatuman niini aron nga dili makalusot sa syudad ang COVID 19 hilabi na karon nga aduna nay usa nga nagpositibo niini sa SOCCKSARGEN Region.
