Karsada maoy sunod nga assignment sa mga pulis dinhi sa dakbayan sa Sugbu nga marelibuhan gikan sa ilang puwesto kay nasakpan nga wa magtarong sa trabaho .
Ang hepe sa Cebu City Police Office , Sr . Supt. Royina Garma nisugod na pagrelibo sa lima ka mga polis sa Abellana Police Station 2 ug hepe sa Parian Police Station kagahapon .
Iya ning gipang-imbargohan ug armas ug idestino niya kini sa beat patrol diha sa kadalanan .
Matud ni Garma bisan ug way armas iya kining padyutihon tungod kay nagdawatan man gihapon sila ug sweldo gikan sa PNP .
Wa mabalaka si Garma nga mameligro ang kinabuhi sa mga polis nga iyang giimbargohan sa armas samtang nag-foot patrol tungod kay mahimo silang manawag ug back-up gikan sa SWAT kung makasugat ug alarma .
