Ginaawhag ni Dr. Rogelio Aturdido Jr., Provincial Health Officer sang South Cotabato ang mga pumuluyo dire sa probinsya nga pabakunahan batok polio ang mga bata lima ka tuig panubo.
Ini matapos nga sa sulod sang 19 ka tuig nga polio free ang pungsod Pilipinas nagbalik ang nasambit nga balatian tungod manubo ang polio vaccination rate.
Samtang dire sa South Cotabato suno kay Dr. Aturdido yara lang sa 75 porsyento ang nabakunahan batok polio sang tuig 2018 tungod sa epekto sang dengvaxia scare.
Kaangot sini, ginhatagan punto ni Dr. Aturdido nga ang epektibo nga pamaagi nga maprebentar ang balatian nga polio amo ang pagpabakuna nga libre naman nga ginahatag sa mga health center.
Kinahanglan lamang suno pa nga kumpletuhon ang 3 doses sang oral polio vaccine nga epektibo kag safe.
Isa man sa dapat nga himuon agud maprebentar ang balatian nga polio amo nga kaayuhon ang environmental sanitation.
Sa subong suno kay Dr. Aturdido ginahulat nila ang direktiba sang Department of Health angot naman sa ipatigayon nga operation patak batok polio.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
